Plantun de Prouvènço

Pèr coumpara dos planto d'encò nostre

Kali soda & Juncus effusus

Kali soda

Amaranthaceae Chenopodiaceae

Nom en français : Soude brûlée.

Descripcioun :
Planto de l'an, poupouso, que trachis dins li sablo e limoun. Se destrìo de la sòudo, Kali australis, emé si bratèio proun espinouso.

Usanço :
La sòudo-bastardo servié, à passa tèms, à la fabricacioun de saboun. Un cop acampado, li sòudo coume d'àutri planto de bord de mar e de sansouiro coume li lis engano, èron cremado pèr recupera li cendre riche en carbounato (alcalin). Mescla i soubro d'òli, acò fai de saboun ; cadun counèis la qualita d'aquéu de Marsiho. Es uno planto pas marrido à manja, subretout boulido e adoubado coume d'espinarc.

Port : Erbo
Taio : 20 à 70 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Kali
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : 5
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : 0 à 200 m
Aparado : Noun

Liò : Sablo - Mar - Limoun de ribiero
Estànci : Termoumediterran à Mesoumediterran
Couroulougi : Cousmoupoulito
Ref. sc. : Kali soda Moench, 1794 (= Salsola kali L., 1753 )

Jounc-de-froumage

Juncus effusus

Juncaceae

Autre noum : Jounc-de-toumo.

Noms en français : Jonc diffus, Jonc épars.

Descripcioun :
Aquéu grand jounc trachis dins li palun, li mueio e li prado umido. Se recounèis majamen que li cambo, pleno, se roumpon eisa au contro dóu jouncas, Juncus inflexus. L'enflourejado es en ventau e li guèno di fueio soun bruno.

Usanço :
Coume soun noum lou dis, aquéu jounc servié à passa tèms à estourri li froumage (TdF). Se fasié de clado emé li tijo mounte èron pausa li caiat.